Energija a škit klimy
Klimoškitny koncept gmejny Radwor
Klimoškitny koncept gmejny Radwor je zhotowjeny. 12. měrca 2025 wobzamkny gmejnska rada zwoprawdźenje koncepta a natwar klimoškitneho kontrollinga. Wot 1. oktobra 2023 bu koncept wot klimo škitneho managera a społnomócnjeneho, eksterneho posłužbowarja (Lipšćanski institut za energiju) wudźěłany. Personalne městno w gmejnskim zarjedźe, eksterny posłužbar a wěcne wudawki buchu při tym 100 % wot Zwjazka přez komunalnu směrnicu financowane.
We wšej krótkosći zjimane bu za gmejnu minjene měsacy energijowa a parnišćopłunowa bilanca zestajana, potenciale za zasadźenje wobnowjomnych nošerjow energije zwěsćene a scenarije nastajene, kak móhłoj přetrjeba a produkcija energije w bliskim a dalokim přichodźe wupadać. We wobłuku wobdźělenskich zarjadowanjow w aprylu a meji 2024 buchu prěnje wuslědki předstajene a nastorki resp. ideje wobdźělnicow a wobdźělnikow za naprawy k wuhotowanju temow energija a škit klimy přiwzate. Tute buchu potom w tak mjenowanych naprawowych łopjenach za slědowace štyri jednanske wobłuki zjimane:
- klimje přichilene zarjadnistwo,
- wobnowjomna energija, energijowa eficienca, zastaranje z energiju w priwatnych domjacnosćach a předewzaćach
- mobilita
- kubłanje, wobdźělenje a zjawnostne dźěło
Naprawy su žro zwoprawdźenskeho procesa wot apryla 2025. Na přikład ma so w blišim času přewětrjenska připrawa a wobswětlenje w sportowej a wjacezaměrowej hali SLAVIA wuměnić. Nimo toho ma etablěrowanje komunalneho energijoweho managementa přetrjeby a kóšty energije redukować. Za nadróžne wobswětlenje ma so wobstatkowa analyza přewjesć a strategija za přestup na LED-swěćadła nastajić. Nimo toho maja so potenciale nastupajo solarnych třěchow na komunalnych twarjenjach zwěsćić a wotkryć. Dale ma z komunalnym planowanjom ćopłoty kóždy wjesny dźěl gmejny Radwor zhonić, kotre zastaranje z ćopłotu na městnje w přichodźe faworizuja. Ze załoženjom energijoweho drustwa chcedźa zhromadnje ze sobustawami projekty, n. př. solarne připrawy na komunalnych twarjenjach, zwoprawdźić. Za šulerki a šulerjow organizuja so pućowanske dny a ekskursije k připrawam za wudobywanje energije kaž tež eksperimenty k energijowym temam. Dale ma ludnosć móžnosć dóstać, we wobłuku „dnja wotewrjeneje ćopłotneje syće“ za kulisy produkcije ćopłoty hladać.
Nadrobniši přehlad k naprawam namakaće w kapitlu 11 klimoškitneho koncepta resp. w zjeću koncepta. Dalše informacije k tomu namakaće w PDF-dokumenće.
Kóždu wutoru móžeće nimo toho swoje prašenja kołowokoło temow energija a klima w „energijowej rěčnej hodźinje“ stajeć. Prosy so wo dočasne přizjewjenje přez deleka stejace kontaktne daty. Wězo móžeće tež rady zbytne dny tydźenja kontakt nawjazać!
Download klimoškitny koncept gmejny Radwor
Download krótke zjeće a zwoprawdźenske naprawy klimoškitneho koncepta
Download wobzamknjenje gmejnskeje rady
kontakt
Gmejna Radwor
Marcel Bellmann
tel.: 035935 21639
mejlka: klima@radibor.de
